نتيجة لكثرة طلبات نماذج صيغ عقود واعتماد الكثير من حديثي التخرج على الصيغ الجاهزة وهو فعل منتشر وخاطئ قررنا اننا نعمل موضوع ازاي تكتب عقد وهنبدأ بعقد الايجار بما انه سهل نوعا ما

الفرق بين المحامي وغيره ان المحامي درس القواعد القانونية الحاكمة للعقود بصفة عشان كده احنا هنا مش هنتكلم عن قواعد قانونية احنا هنعمل فكرة وهي اننا هانقول كيف تضع تلك القواعد في صورة عقد

ازاي نكتب عقد ايجار :

اولا اطراف العقد :

اي عقد لابد اننا نحدد اطرافه اولا وهنا الطرف الاول اسمه مؤجر وقد يكون اكثر من شخص والطرف الثاني مستأجر وقد يكون ايضا اكثر من شخص

طيب انا اعمل ايه حضرتك اولا ً لازم تعرف بيانات المؤجر وهو طبعا اسمه وعنوانه وجنسيته ورقمه القومي او جواز سفره وكذلك المستأجر بحيث تتأكد انك كل طرف على علم بشخصية الاخر واذا حدث نزاع بينهم يكون كل منهم على علم ببيانات الاخر

البند التمهيدي

بعد كده البنود بقدر الامكان حول تعرف سند ملكية المؤجر للعين المؤجرة منعا لظهور مالك اخر بعد تمام العقد يكون المستأجر لايعلم عنه شيئا

ثانيا عقد الايجار يتمحور حول العين المراد تأجيرها ومدة الايجار والقيمة الايجارية :

لو عايز تكتب عقد ايجار بسيط هتركز عليهم فقط لكن لو كنت محامي عن احد الطرفين اذا لابد ان تتابع الموضوع حتى اخره لكى تحاول ان تحافظ على حقوق موكلك

العين المؤجرة

لازم توصف العين المؤجرة بشيئ من التفصيل يعني الشقة رقم كذا بالدور الفلاني بالعقاررقم كذا ـــ ولو امكن اذكر حدود العقار ـــ
واذكر طبعا العنوان بالتفصيل وكذلك تفصيل الشقة يعنى مساحتها ومكونة من كام غرفة وهكذا

الغرض من التأجير

هل الغرض سكنى تجاري اداري لازم تحدد خصوصا اذا كنت عن المؤجر حتى لا يتفاجئ المؤجر باستغلال العين مغايرة لما اتفق عليه و مثيرة للمشاكل او بطريقة قد تؤدي الى اضرار بالعين وحتى لا يتحدى المستاجر بالمادة 4 من القانون المدني وهو استعمال حقه بطريقة مشروعة مثلا

مدة الايجار

هنا مش محتاج اتكلم كتير لكن احب انوه بلاش نعمل حاجة نندم عليها بعد كده ولازم نعرف ان العقد شريعة المتعاقدين ولازم نوضح فيه كل حاجة بالظبط يعني بلاش كلمة مشاهره بعد قانون 4لسنة1996 مشاهرة يعني الشهر بشهره بلاش تسيب المدة الايجارية من غير تحديد او تكتب تاريخ البداية وماتكتبش ينتهي امتى الحاجات دي مش بنشوفها في اي مكان بالعالم غير هنا وبتعمل مشاكل كتيير للاسف خليك في الامان مدة عقد ايجار كذا تبدا في ترايخ \ \ وتنتهي في \ \

القيمة الايجارية

هنا كمان مش محتاج كلام كتير بس لازم اقول انك تحدد القيمة الايجارية وتحدد ميعاد استحقاقها باليوم واذا تاخر المستأجر هيحصل ايه ومدة التاخير دي ممكن تكون كام يوم تذكر دائما اكتب كل حاجة بالتفصيل عشان كل حاجة تكون واضحة ومنظمة في

العقد

بعد ان تحدثنا عن اهم اركان عقد الايجار وهم الاطراف والعين المؤجرة القيمة الايجارية وكذلك مدة الايجار ندخل على جزء اخر مهم وهو التزامات المؤجر والمستأجر

التزمات المؤجر

هو المؤجر عليه التزامات ؟؟!!!

طبعا مش معنى ان المستأجر هينتف بالعين يبقى كده انتهت علاقة المؤجر بالعين لا عليه بعض الالتزامات لابد ان تحرص على وجودها خصوصا اذا كنت موكل من قبل المستأجر منها على سبيل المثال:

اهم التزام على المؤجر هو تمكين المستأجر من الانتفاع بالعين المؤجرة وفي سبيل الالتزام ده بيقع على المؤجر اقي الالتزامات مثلا

1- تسليم العين المؤجرة

لازم تحدد ميعاد التسليم باليوم والتاريخ وتكتب لو حصل تأخير ايه العاقب على كده وتحدد مدة التأخير في التسليم على وجه الدقة

2- صيانة العين المؤجرة

وان كان المستأجر هو لمنتفع بالعين لك يقع على المؤجر عبء صيانة بعض اجزاء العين مثال اذا حدث تصدع في احد حوائط العين او ماشابه ذلك مما يعتبر من عيوب العين

3- ضمان التعرض

ايضا لابد من النص على ضمان المؤجر عن عدم التعرض للمستأجر سواء من قبله او من قبل الغير وطبعا اشهر مثال تمكين الزوجة من العين المؤجرة على اعتبار انها مسكن زوجية

4- ضمان العيوب الخفية .

والعيب الخفي له شروط منها ان يكون غير ملعوم للمستأجر وأن يكون مؤثر يعني يكون على درجة من الجسامة بحيث لايستطيع المستأجر الاتفاع بالعين مثلا اذا كانت مواسير الصرف بعد فترة من الاستخدام شهر مثلا تطرد ما بها من اذى داخل العين ولا بد من تغييرها

طبعا لازم نوضح في كل التزام جزاء عدم القيام به او التأخير في لقيام سواء كان فسخ عقد الايجار او قيام المستأجر بالترميمات الضرورية لحفظ العين وخصم ما تم صرفه من الاجرة او الرجوع على المؤجر

التزمات المستأجر

1- دفع الأجرة : وسبق وان تحدثنا عنها

2- حفظ العين : حفظ العين من اهم التزامات المستأجر لان في اوقات كتير المؤجر يكون ساكن بعيد عن العين وبالتالي مش هيقدر يراقب العين ويشوف هل المستأجر بيقوم باعمال من شانها الاضرار بالعين ام لا فلازم نوضح للمستأجر انك تحافظ على العين وانك منتفع فقط م مالك لان فيه ناس بتتخيل طالما بدفع اجرة يبقى المكان بتاعي اهدم حائط ابني حائط انا حر طبعا ده خطأ بالاضافة لقيامه بالترميمات الناتجة عن سوءء استخدامه او استهلاكه للعين

3- دفع ما قد يستحق على العين نتيجة استخدامه من كهرباء ومياه وضرائب ان وجد وخلافه

4- الالتزام بالغرض من الايجار المتفق عليه

5- اخطار المؤجر قبل القيام بعمل اي ترميمات وكذلك اذا اراد ان ينهى عقد الايجار قبل مدته

6-عدم الايجار من الباطن وطبعا من اهم الالتزامات التي يجب النص عليها بالعقد

7- رد العين المؤجرة للمؤجر فور انتهاء عقد الايجار

بكده نكون اتكلمنا عن اهم النقاط في عقد الايجار طبعا ممكن الطرفين يتفقوا على حاجة مش موجودة فيما سبق وممكن تكون مش موجودة في اي صيغة ولا عقد ، مفيش مشكلة تتكتب في بند لكن بعد ما تتاكد من مدى قانونية هذا البند او انه لايضر موكلك

وتذكر دائما العقد شريعة المتعاقدين بمعني حاول تكون دقيق في اي حاجة بتكتبها حتى لو تعامل صوري بين اب وابنه طبعا بيتم تحرير العقد من نسخ بقدر اطرافه يفضل ان تقوم بعمل اثبات تاريخ لموكلك على النسخة الخاصة به

اعادة نشر بواسطة محاماة نت .