الاستيقاف في قانون الاجراءات الجنائية

كتير منا بيبقى ماشي في الشارع و بيشوف احد رجال الشرطة بيستوقف احد المارة و بيطلب منه اثبات الشخصية و احيانا بيقوم بتفتيشه سئلت نفسك هل الاجراء اللي بياخده رجل الشرطة ده قانوني و لا لأ و إسم الإجراء ده إيه
تعالوا معانا نتعرف علي هذا الاجراء و مدي قانونيته

س : ما اسم الاجراء الذي يقوم فيه رجال الشرطة بايقاف المواطنين و طلب تحقيق الشخصية منهم ؟
ج : الاجراء ده اسمه الاستيقاف

س : ما هو الاستيقاف ؟
ج : الاستيقاف هو ايقاف شخص لسؤالة عن اسمه وصناعته وعنوانه و وجهتة ومحل اقامته دون تقييد لحريته فى التنقل والحركة ودون استخدام القوة

س : من يقوم بالاستيقاف ؟ او من له الحق في استيقاف المواطنين ؟
1- مأمور الضبط القضائى في غير احوال التلبس مامور الضبطية القضائية هو وضباط صف الشرطة كل في دائرة اختصاصه
2 – كما يحق لرجال السلطة العامة مباشرة هذا الاجراء ” و رجال السلطة العامة هم من تم منحهم بحكم وظيفتهم صفة الضبطية القضائية

س : ممكن ان يكون الاستيقاف في اي مكان ؟
ج : يكون الاستيقاف في الاماكن العامة مثل الشوارع والمتاجر وغيرها وقد يتطلب الامر ايقاف السيارات العامة او الخاصة اذا توافرت الشروط التى تبرر هذا الاجراء

س : هل يمكن ان يتم الاستيقاف في المنازل ؟
ج : لايتم فى الأماكن الخاصة الا بإذن من النيابة العامة

س : و ما ضمانتي ان من يطلب مني تحقيق الشخصية هو ضابط شرطة ؟
ج : من حقك تساله عن تحقيق شخصيته و ده حقك طبقا للمادة 24 مكرر من قانون الاجراءات الجنائية و التي اضيفت بالقانون رقم 174 لسنة 1998 و التي تنص علي ” لمأمور الضبط القضائى ومرؤوسيهم ورجال السلطة العامة ان يبرزوا ما يثبت شخصياتهم وصفاتهم عند مباشرة أى عمل أو اجراء منصوص عليه قانونا و لا يترتب على مخالفة هذا الواجب بطلان العمل أو الاجراء وذلك دون اخلال بتوقيع الجزاء التأديبى

س : و هل من حق رجال الشرطة اسيتيقاف اي شخص ؟
ج : ليس من حق رجال الشرطة ايقاف اي شخص لسؤاله عن تحقيق شخصيته او … او … و انما يفترض ان يضع الشخص نفسه فى موضع الريبة والشبهات التى تستلزم تدخل رجل السلطة العامة للكشف عن حقيقتة .او ان يكون الشخص من ذوى الشبهة والمتشردين

س : يعني ايه وضع نفسه في موضوع الريبة و الشبهات ؟
ج : يعني يكون مثلا ماشي بالليل بيلعب في كوالين العربيات المقفولة، أو جنب أقفال المحلات المقفولة و بيحاول يفتحها، أو شايل حاجات زي أجهزة كهربائية و عمال يتلفت يمين و شمال، أو على هدومه آثار دم أو متعور أو حاول يجري أو يتدارى لما شاف البوكس أو الأتاري، أو يكون ماشي بيتطوح أو بيدخن مخدرات أو شايل سلاح…إلخ ” نقض 30\3\1953 ؛ قواعد النقض ج2 رقم 20 ص 929
نقض 7\11\1955 ؛ قواعد النقض ج2 رقم 22 ص 929 “

س : ماذا لو استوقني رجل الشرطة بدون وجه حق فلا انا متشرد و لا وضعت نفسي موضوع شبهة ؟
ج : في هذه الحالة قم بابراز تحقيق الشخصية الخاص بك و حينها تنتهي المشكلة

س : ماذا لو اصر رجل الشرطة من اصطحابي معه للقسم رغم انني ابرزت له تحقيق شخصيتي ؟
ج : لك ان تساله باي تهمة فقد يكون لك امر ضبط و احضار او مطلوب تنفيذ حكم عليك

س : ماذا افعل لو قال لي انه يشتبه في او سوف ياخذني تحري ؟
ج : لا يستطيع ان ياخدك اشتباه لانه صدر حكم المحكمة الدستورية العليا بالغاء الاشتباه ” حكم المحكمة الدستورية العليا في جلسة 2\1\1993 برئاسة المستشار عوض محمد المر
”
س : أعمل إيه لو تم ايقافي و طلعت لهم البطاقة و أنا رجل سليم و قالوا لي “طلّع ال في جيوبك” و عاوزين يفتشوني؟
لو أنت سليم و عارف أنك سليم و ما فيش عليك أي أحكام و لا لك أمر ضبط و إحضار و مش ممسوك متلبس بجريمة و شاف بطاقتك، قل له بكل ذوق “يا حضرة الضابط أو يا حضرة الأمين أنت طلبت البطاقة وريتها لك و أنت رجل قانون و عارف أكثر مني أن التفتيش محتاج إذن من النيابة، و لو فتشتني هيكون تفتيشي إجراء غير قانوني، و أنا متأكد أن رجل القانون مش ممكن يخالف القانون”
” المادة 41 من الدستور “

س : أعمل إيه لو استعمل معي القوة و خلى العساكر ال معه تمسكني و تفتشني بالعافية ؟
ج : فهمه ان ده إجراء خاطئ و غير قانوني و مش من حقه و الضابط لو حس أنك عارف حقوقك كويس و إنك هتشتكيه للمأمور و لمفتش الداخلية و إن المأمور و مفتش الداخلية لو عرفوا مش هيقبلوا بدا، و أنك مش هتتنازل عن حقك أبدا مهما حصل، و حاول يكون معك شهود من الناس اللي ماشيين في الشارع على تفتيشك و شافوا اللي حصل لك، لكن لا تغلط و لا يستفزك علشان ما يعمل لك محضر تعدي على موظف أثناء تأدية عمله، و أول ما توصل للقسم تعمل له محضر أنه قبض عليك و فتشك و حجزك دون وجه حق.

س : لو شتموني و ركبوني البوكس بالعافية و أخذوني القسم و عملوا لي محضر و حجزوني؟
ج : لو الضابط حس أنك بتتكلم معه بجد و حسم و ذوق و مش خايف منه و إنك فاهم حقوقك كويس، مش هايخذك القسم من أساسه، لكن لو أخذك القسم اطلب مقابلة المأمور و أو نائب المأمور و اشرح له الموضوع و إن الضابط قبض عليك و فتشك من غير داع و بدون رضاك و بدون وجه حق، و إنك لجأت له لأنه المسؤول عن القسم بضباطه سواء كانوا مباحث أو نظام، لأن مأمور القسم رئيس القسم كله بمن فيهم رئيس المباحث نفسه، و هتلاقي المأمور رجل كبير و مسؤول فاهم حقوق الناس كويس و هيحاسب الضابط على خطئه في حقك، و هيرجع لك حقك و يجازي الضابط أو الأمين أو المندوب اللي غلط في حقك و تصمم تعمل محضر باللي حصل لك و لو رفضوا يعملوا لك محضر في القسم تعمل له محضر عند مفتش الداخلية في مديرية الأمن أو تروح للنيابة.
” المادة280 و 282 من قانون العقوبات، فقرة 2
نقض 16258 لسنة 66ق جلسة 2\7\1998 أحكام النقض “

س : أعمل إيه لو عملوا لي محضر تحري و حبسوني؟
ج : ما فيش حاجة اسمها “محضر تحري” و ما تمضيش على المحضر و حاول تتصل بأي حد من قرايبك أو من أصحابك علشان يبعثوا تلغرافات فورا إلى وزير الداخلية و النائب العام و رئيس نيابة المنطقة ال فيها القسم ال أنت ممسوك فيه و يقولوا فيها أنك مقبوض عليك في القسم دون سبب و دون وجه حق، و يا ريت تكتب اسم الضابط أو الأمين اللي قبض عليك لو قدرت تعرف اسمه، و لو تعرف محامي خله يجي لك القسم و أكيد هيطلعك لو كنت سليم و مش متهم في قضايا أو عليك أحكام
” المادة 180 و 282 من قانون العقوبات
المادة 139 من قانون الإجرارات الجنائية
طعن رقم 3055 لسنة 58ق جلسة 20\11\1988 “

اعادة نشر بواسطة محاماة نت